Gjendje mjeruese e infrastrukturës së shëndetësisë, asnjë spital në fshatra

Nëse dikur kishte spitale nëpër fshatra, sot nuk numërohet asnjë.

Pas viteve ’90 në spitalet shqiptare numëroheshin mbi 8.700 shtretër në dispozicion për pacientët. Ndërkohë që sot, pavarësisht numrit më të ulët të spitaleve, janë në dispozicion të pacientëve në të gjithë vendin mbi 9 mijë shtretër.

Ditë-qëndrimi në spital në vitin ’93 ishte mbi 12 ditë, ndërsa sot mesatarja e ditëve që qëndron një i shtruar në spital është vetëm 6 ditë. Në vitin ’94, statistikat e Ministrisë së Shëndetësisë referojnë se gjithsej ishin në funksion plot 51 spitale, ndërsa sot janë plot 45 qendra spitalore. Aktualisht kemi raportin, 1.41 spital për 100 mijë banorë, raport që pas viteve ’90 ka qenë 1.59 për 100 mijë banorë. Në vitin 1993 kemi mbi 166 mijë të shtruar në spitale, ndërkohë që në vitin 2008 numërohen mbi 260 mijë të shtruar.

Po ashtu, shfrytëzimi i shtretërve në spitale ka qenë më i lartë në vitet ’90 sesa aktualisht. Përkatësisht, sipas të dhënave të vendosura në dispozicion nga Ministria e Shëndetësisë të publikuar nga “ODA”, kemi ulje të konsiderueshme të shfrytëzimit të shtretërve spitalorë në vitet 2007-2008.

Në vitin 1993 kemi më shumë se 3 mijë qendra shëndetësore në të gjithë vendin, ndërsa sot numërohen rreth 2500 të tilla, duke përfshirë këtu ambulanca, qendra shëndetësore dhe poliklinika. Ndërsa pas viteve ’90 vizitat në familje ishin të konsiderueshme, sot ky numër është ulur në nivele të konsiderueshme. Atëherë në 1 mijë banorë kishim rreth 445 vizita, ndërsa sot kemi në 1 mijë banorë vetëm 137 vizita.

Postoje